Centos de persoas participan nas manifestacións contra a LOMCE e as reválidas
Por Mónica Patxot & Anxo Lourido
Centos de persoas déronse cita na tarde deste mércores 26 para mostrar a súa oposición á LOMCE (lei orgánica de mellora da calidade educativa) e ás reválidas.
Ás 18.00 horas saía da praza da Peregrina a marcha convocada pola Plataforma pola Defensa do Ensino Público, coa participación das centrais sindicais UXT e CC.OO., ademais dos representantes da FANPA (Federación Provincial de ANPA de Centros Públicos de Pontevedra). Rogelio Carballo, presidente deste colectivo, destaca a alta participación na xornada de folga convocada por estudantes e pais para este mércores. "Foi espectacular, estamos abraiados", afirmou sobre o consenso logrado nas aulas en contra do anacronismo das reválidas.
Segundo os datos que manexa a federación, a media de seguimento da folga en primaria é do 60% porque é máis "difícil conciliar", afirmou o presidente de FANPA. En secundaria, o seguimento foi contundente, cunha porcentaxe dun 90%. En institutos como o Sánchez Cantón, só asistiron dous alumnos a algunha das clases.
A manifestación finalizou ante a Subdelegación do Goberno onde unha alumna leu un comunicado reivindicativo do ensino público e contrario á posta en marcha da reválida. Neste acto estiveron presentes representantes políticos como o portavoz do grupo municipal socialista Tino Fernández, o portavoz de Marea Pontevedra, Luís Rei e a parlamentaria socialista Patricia Vilán.
Rogelio Carballo lamentou tamén que se realizasen dúas manifestacións cunha hora de diferenza para reivindicar os mesmos obxectivos xa que ás 19.00 horas tamén se concentraron os integrantes da Plataforma Galega en Defensa do Ensino Público, con representantes de formacións nacionalistas como a CIG e o BNG con concelleiros como Carme da Silva, Carmen Fouces ou Luís Bará. Centos de persoas tamén asistiron a este outro acto de protesta, que se desenvolveu na praza da Peregrina.
As organizacións quedarán á espera do que suceda politicamente para comprobar se vai levarse a cabo algunha reconversión da LOMCE, que poida poñer fin á reválida.
Relacionadas:
-
Chaman a baleirar as aulas o 16 de febreiro para parar a LOMCE
Por Natalia Puga & Mónica Patxot |
-
O alumnado móllase pola retirada da Lomce
Por Mónica Patxot & Oskar Viéitez |
-
Convocada unha folga en Secundaria contra a LOMCE e as reválidas
Por Oskar Viéitez |
-
Alto seguimento da folga de estudantes contra as reválidas nos centros de Pontevedra
Por Redacción |
-
A comunidade escolar, convocada a saír á rúa contra as reválidas e a LOMCE
Por Redacción |