A comunidade escolar, convocada a saír á rúa contra as reválidas e a LOMCE
Por Redacción
Este mércores 26 de outubro está prevista unha xornada denominada "de loita" contra as reválidas e co obxectivo de que se derrogue a LOMCE, convocada polos estudantes e polas asociacións de nais e pais que se constatará cunha folga da comunidade educativa, desde infantil ata bacharelato, e cunha manifestación. Varios representantes da Plataforma en Defensa do Ensino Público de Galicia co presidente da FANPA de Pontevedra, Rogelio Carballo, e membros dos principais sindicatos expuxeron os motivos polos que leva a cabo esta convocatoria.
Sinalan que é necesario que a educación dos menores vaia dirixida a poder defenderse nunha sociedade que lles demandará creatividade, orixinalidade e innovación.
Cristóbal Salgueiro, de UXT, afirma que as reválidas impiden o acceso a determinadas titulacións e trátase dun cambio moi serio realizado a través dun decreto que non se someteu a debate e á avaliación suficiente. Ademais, consideran que se trata dun menosprezo ao profesorado.
Entenden que as reválidas supoñen que un escolar cun currículo brillante en bacharelato non poderá obter o título por non pasar esa proba nin acceder á universidade porque teña un mal día fronte a un exame. Por este motivo continuarán cun calendario de actuacións conxuntas contra as reválidas.
Esperan que a xornada deste mércores resulte un éxito que provoque un cambio na actitude do Partido Popular á fronte do goberno en funcións. En Pontevedra, a Federación organiza unha manifestación que partirá ás 18.00 horas da praza da Peregrina e dirixirase ata a Subdelegación do Goberno para retornar, a continuación, á Peregrina.
Relacionadas:
-
Convocada unha folga en Secundaria contra a LOMCE e as reválidas
Por Oskar Viéitez |
-
Centos de persoas participan nas manifestacións contra a LOMCE e as reválidas
Por Mónica Patxot & Anxo Lourido |
-
Alto seguimento da folga de estudantes contra as reválidas nos centros de Pontevedra
Por Redacción |
-
O 26 de outubro, folga no ensino contra as reválidas
Por Oskar Viéitez |