Cancelan a carreira de parrulos de goma do Surfing the Lérez ante as críticas polos danos ambientais
Por Redacción
O Lérez xa non se encherá de parruliños de goma para botar carreiras ao longo do río o próximo 13 de xuño, tal e como tiña prevista a organización do Surfing the Lérez. Finalmente, decidiuse suspender esta iniciativa debido ás críticas de ecoloxistas que entendían que a "solta" destes parrulos podería provocar que os exemplares chegasen ata o mar.
Ante esta formulación, a organización do Surfing the Lérez e a Asociación de Comerciantes da Zona Monumental, que tiña previsto levar a cabo esta proposta, decidiron cancelar a actividade porque "non teñen intención de molestar a ninguén". E engaden, a través dun comunicado, que só queren utilizar os espazos da Illa das Esculturas con todo o respecto.
En todo caso a organización sinala que haberá numerosos xogos populares para os nenos e que se instalará unha carpa para a comida, que nesta edición se realizará a través dunha empresa.
SEN BOTELLÓN
Dende a organización do festival de música no que actuarán grupos como Lost Acapulco, Guadalupe Plata ou Wyoming & Los Insolventes, tamén alertan de que non queren que se celebren "botellóns" con motivo desta cita. Insisten en que ao tratarse dun festival de entrada gratuíta, os únicos beneficios que obtén a organización se derivan da venda de comida e bebida no recinto e engaden que, en anos anteriores, o espazo quedou moi sucio debido aos restos dos botellóns que algúns mozos realizaron con motivo dos concertos.
Nesta ocasión, no Surfing the Lérez actuarán 12 grupos, ademais de Cantos da Taberna e dous Djs.
Relacionadas:
-
O Surfing The Lérez xa ten nova data: o 26 de setembro
Por Redacción |
-
Suspendido o Surfing the Lérez ante a previsión de mal tempo; outubro, data máis probable
Por Redacción |
-
500 parrulos de goma baixarán polo río no Surfing the Lérez máis divertido
Por Redacción |
-
Wyoming & Los Insolventes, Los Motores e Guadalupe Plata, entre os participantes de Surfing the Lérez 2015
Por Redacción |