Copa do Rei de balonmán: Ilusión ou ruína para o Teucro?
Por Diego Espiño
Por primeira vez a Copa do Rei de balonmán ábrese aos equipos da División de Honra Prata, depués do cambio de formato experimentado xa a pasada tempada.
Lonxe de contentar a todos os participantes da segunda división nacional, os criterios da competición provocaron as críticas de moitos dos clubs, entre os que se encontra o Teucro, por excluír da primeira rolda aos equipos da Liga Asobal e non ter en conta a proximidade xeográfica á hora do sorteo.
Así o club azul prepara xa a longa viaxe que afrontará esta fin de semana para xogar ante o Benidorm (domingo, 12:30 horas no Palau Esports L'Illa de Benidorm).
Ir a Benidorm sairalle ao Teucro por preto de 4.000 euros
Con 1.080 quilómetros de distancia e tendo que afrontar unha noite de hotel, os pontevedreses deberán asumir uns gastos próximos aos 4.000 euros cos que non contaban e sen opción a recuperar parte, pois a recadación do encontro corresponde ao equipo local e a Federación Española, a pesar das queixas dos clubs, negouse a proporcionar unha axuda.
Ademais do Benidorm-Teucro, na primeira eliminatoria entre os equipos da División de Honra Prata o Octavio deberá desprazarse a Bordils, mentres o Chapela recibirá o equipo cordobés do Pozoblanco.
Fronte a este imprevisto, o equipo adestrado por Javier Barrios busca seguir na competición coa ilusión deportiva de poder competir contra clubs da Liga Asobal.
En caso de gañar en Benidorm, nunha eliminatoria que se xoga a partido único, os teucristas accederían a unha segunda fase na que se cruzarían cos dous ascendidos á máxima categoría e os seis peores equipos de Asobal a pasada campaña.
Só se superasen esa rolda accedendo aos oitavos de final poderían cruzarse cos, en teoría, oito mellores equipos do país, como o todopoderoso Barcelona.
Segundo o esquema da competición en cuartos de final as eliminatorias serían a dobre partido e con sorteo puro, mentres semifinais e final se disputarán seguindo o modelo de final a catro os días 3 e 4 de maio nunha mesma sede.
Relacionadas:
-
Quenda para a Copa do Rei de balonmán coa visita do Cuatro Rayas Valladolid
Por Diego Espiño |
-
O bombo emparella ao Teucro co Cuatro Rayas Valladolid na Copa do Rei
Por Diego Espiño |
-
O Teucro avanza na Copa do Rei tras gañar en Benidorm (22-24)
Por Redacción |
-
Benidorm, rival do Teucro en primeira rolda da Copa do Rei de Balonmán
Por Diego Espiño |