O soño de Saleta Castro faise realidade en Hawaii
Por Diego Espiño
"Como buena novata que soy estoy alucinando con todo". Son palabras de Saleta Castro desde Hawaii, onde a través das redes sociais transmite as súas primeiras sensacións na meca do tríatlon.
A triatleta pontevedresa fará realidade o seu soño o vindeiro sábado, 8 de outubro, ao participar no Campionato do Mundo Ironman en Kona, na categoría reservada para os profesionais.
Polo momento tenta aclimatarse ás illas con adestramentos suaves nos que aproveita para coñecer o circuíto da carreira, como a baía de Kailua na que "después de tantos años viendo el Pier en fotos y vídeos" puido nadar estes días.
Saleta deberá completar un esixente percorrido de 3,86 quilómetros de natación, 180,2 quilómetros de ciclismo e un maratón a pé. Todo desde as 18:30 horas do sábado (hora española) e ante as mellores especialistas mundiais do tríatlon de longa distancia, xa que só participan na proba as 40 mellores clasificadas do ránking internacional.
Será a deportista máis nova da delegación profesional española, no que supón un premio ao seu esforzo e traxectoria despois dun final de tempada no que superou obstáculos para lograr os puntos necesarios que lle deron o pasaporte a Hawaii.
"Vayas por donde vayas se respira el ambiente Ironman", recoñece entusiasmada a pontevedresa, que ademais aproveita estes días para empaparse da cultura hawaiana e realizar actividades como o submarinismo.
Unha experiencia única na que hai unha figura clave, o seu adestrador Luc Van Lierde, toda unha lenda en Hawaii tras conseguir gañar dúas veces o Campionato do Mundo, en 1996 e 1999, e ao que lle dá as grazas "por creer en mí".
Relacionadas:
-
Saleta Castro, deportista 'non grata' no CGTD
Por Diego Espiño & Mónica Patxot |
-
"Feliz" primeira experiencia de Saleta Castro no Ironman de Hawaii
Por Diego Espiño |
-
Ironman faino oficial, Saleta Castro clasificada para o Mundial de Hawaii
Por Redacción |
-
Saleta Castro acaba en cuarta posición o Ironman 70.3 de Dublín
Por Diego Espiño |
-
Saleta Castro, segunda no Ironman de Maastricht, a un paso do mundial de Hawaii
Por Ramiro Espiño |
-
Final feliz para Saleta Castro, que recupera a súa bicicleta para competir no Ironman de Maastricht
Por Diego Espiño |
-
Vueling perde a bicicleta de Saleta Castro a poucos días de que se xogue a súa presenza no Mundial Ironman
Por Diego Espiño | Creada e actualizada