Bueu quere que o Estaleiro de Purro tamén teña bandeira azul en 2024
Por Redacción
O Concello de Bueu acaba de presentar as candidaturas para a campaña de Bandeira Azul da próxima tempada 2024 e nesta ocasión presenta dez propostas e a intención de que o Estaleiro de Purro, na Banda do Río, sexa centro azul.
A proposta, que foi presentada á Asociación de Educación Ambiental e do Consumidor (ADEAC) dende a concellaría de promoción económica, turismo e praias, inclúe como novidade esa candidatura do Estaleiro de Purro para que acade o mesmo distintivo de centro azul que xa teñen o Centro de Interpretación de Agrelo e á Aula da Natureza de Cabo Udra.
O estaleiro está ligado intimamente coa historia marítima recente da vila e por iso o Concello levou a cabo nos últimos anos a súa rehabilitación e musealización co fin de conservalo como un dos elementos da arquitectura tradicional mariñeira.
Considerada como a derradeira carpintería de ribeira en activo, nela traballaron e formáronse moitos profesionais e veciños; e tamén se construíron infinidade de embarcacións. O seu peculiar aspecto converteuse en parte da paisaxe urbana de Bueu, actuando como referente da cultura mariñeira.
A concelleira de promoción económica e turismo, Silvia Carballo, destaca que sería "moi importante" para Bueu e para a historia mariñeira e permitiría enlazar os tres centros interpretativos, pois todos pasan pola senda do litoral e forman unha rede museística á que no futuro se incorporará a sala arqueolóxica do 'Bueu Romano', cuxas obras de rehabilitación se atopan na fase final.
O Concello agarda revalidar as bandeiras azuis conseguidas nos últimos anos para as praias da Banda do Río, Area de Bon, Lagos, Portomaior e Lapamán, e os sendeiros do litoral e circular de Cabo Udra.