Falece o histórico alcalde de Ribadumia Nené Barral, pendente de xulgar por contrabando
Por Natalia Puga
Creada e actualizada
Creada e actualizada
José Ramón Barral Martínez, popularmente coñecido como Nené Barral, faleceu este xoves froito dunha enfermidade que xa o pasado mes de setembro motivou que a Audiencia Provincial de Pontevedra decidira arquivar de forma provisional a causa aberta contra el por contrabando de tabaco, suborno e asociación ilícita.
A causa arquivouse ante a imposibilidade de xulgalo a curto prazo e finalmente non poderá ser xulgado ao falecer este xoves aos 79 anos.
Nené Barral estaba casado e tiña catro fillos e tres netos. Será enterrado este venres 24 de novembro no cemiterio parroquial de Ribadumia e a súa familia non recibe dó, segundo consta na esquela feita pública.
A súa avogada neste procedemento xudicial pendente, Carmen Ventoso, amosa este xoves a súa dor pola perda a través dunha mensaxe no seu perfil de WhatsApp: "Hasta pronto, Nené, Amigo. Descansa en paz".
Barral foi alcalde da localidade pontevedresa de Ribadumia entre 1983, con Alianza Popular, e 2001, xa co PP. Ese ano dimitiu tras ser relacionado por un alixo de 400.000 paquetes de tabaco Magnum incautado no Porto de Vigo.
Malia verse obrigado a dimitir hai xa 22 anos por aquela operación policial, nunca chegou a ser xulgado. A súa causa converteuse na pendente de xulgar máis antiga de España e, tras fixarse catro veces nun ano, o pasado mes de setembro acabou arquivada.
Nesta causa había inicialmente 12 acusados e catro xa faleceron antes de chegar a xuízo, tres ata agora e desde este xoves tamén Nené Barral.
A causa arquivouse despois de que a avogada defensora de Nené Barral entregase á presidenta do tribunal, Nélida Cid, un informe forense que confirmaba a súa enfermidade, pero cuxo contido non se facilitou ás partes por protección de datos. Desde entón, e por decisión xudicial, tiña que presentar un informe cada dez días coa "evolución do estado de saúde" do acusado.
O Concello de Ribadumia únese ao loito da familia Barral, tal e como recolle nun comunicado, lembrando con moito agradecemento a dedicación e entrega de Nené ao longo dos anos. "En recoñecemento a todo o que representou para o noso municipio, desde este xoves poñeranse as bandeiras a media asta e o crespón negro", sinalan desde o goberno local.