A sinestralidade laboral reduciuse en Pontevedra un 8,55 por cento en 2013
Por Redacción
A sinestralidade laboral en Pontevedra baixou un 8,55% en 2013, segundo o balance facilitado polo Instituto Galego de Seguridade e Saúde Laboral (Issga).
Ampliando datos, no pasado exercicio foron notificados en Galicia un total de 22.377 accidentes de traballo con baixa en xornada laboral, 1.280 menos que en 2012, dos que 21.912 foron leves, 418 graves e 47 con resultado de morte.
En canto aos accidentes en itinerancia, rexistrados nos desprazamentos de ida e volta ao traballo, producíronse 2.821, un 2,22 por cento menos que en 2012, informou a Xunta nun comunicado.
Os accidentes leves representaron o 97,92 por cento do total e se produciron principalmente no sector de servizos, mentres que o 1,87 por cento graves tiveron unha maior incidencia na industria e a agricultura.
A tendencia decrecente rexistrouse en todos os sectores agás na agricultura: Na construción, un 26,17 por cento; na industria, un 4,06 por cento; na pesca, un 3,24 por cento e nos servizos, un 0,66 por cento; mentres que na agricultura ascenderon un 7,82 por cento.
No que respecta ás enfermidades profesionais, durante 2013 comunicáronse 521 partes que causaron baixa, un 11,84 por cento menos que no ano anterior.