Pontevedra doa suadoiros, camisetas, gorras e mochilas para os migrantes acollidos en Sanxenxo
Por Redacción
Pontevedra respondeu ao chamamento lanzado polo Concello de Sanxenxo xunto a Cáritas e a ONG Accem que coordina a chegada de migrantes africanos a Sanxenxo para cubrir as primeiras necesidades das persoas acollidas.
Pedían sobre todo roupa deportiva de tallas grandes para ser entregadas aos recentemente chegados.
Por ese motivo o Concello de Pontevedra doou 30 suadoiros, 150 camisetas, gorras e mochilas correspondentes á organización dos mundiais de tríatlon.
Os voluntarios de Protección Civil de Pontevedra recibiron o material para achegalo ata o punto de recollida habilitado en Sanxenxo.
"Pontevedra atende este chamamento e manda estes primeiros paquetes", explicou a edil de Benestar Social, Anabel Gulías, afirmando ademais que "aquí estamos para o que se precise tanto nestes primeiros momentos como para cando sexa necesario".