O autor confeso do crime de Mondariz causou 18 feridas co coitelo na cabeza da vítima
Por Oskar Viéitez
Creada e actualizada
Creada e actualizada
Despois da confesión na primeira sesión do xuízo de Miguel Ángel G.M., o acusado polo crime das 90 coiteladas do hostal de Mondariz, este martes retomouse a vista oral na sección cuarta da Audiencia Provincial de Pontevedra coa parte testifical e pericial.
Os feitos que se xulgan ocorreron en xaneiro de 2021. Neses momentos, o acusado e a vítima eran os únicos hóspedes do hostal. Un amigo da vítima explicou que ambos mantiñan unha mala relación de veciñanza porque o Miguel Ángel poñía música a gran volume de madrugada, daba golpes na parede e pedía con frecuencia tabaco á vítima.
Este martes o tribunal do xurado puido coñecer o testemuño dunha das encargadas do bazar de Ponteareas onde, días antes do crime, o 9 de xaneiro de 2021, o acusado comprou un coitelo de cociña que, segundo o informe forense, é compatible coas múltiples feridas que presentaba o corpo da vítima.
Esta muller relatou que, tras adquirir o coitelo, o acusado o desempaquetouno na beirarrúa e simulou apuñalar alguén, asentindo coa cabeza coma se o instrumento cumprise adecuadamente coa función buscada.
Outra testemuña relatou como na habitación do acusado no hostal había danos nun armario, realizados cun coitelo, a modo de "ensaio dun apuñalamento".
O forense explicou durante a vista oral que o procesado foi diagnosticado hai anos de psicose esquizofrénica paranoide e estivo hospitalizado en varias ocasións. Así mesmo, consta que non ten unha boa adherencia ao tratamento que debe recibir de modo crónico.
Segundo este profesional, o acusado podía ter diminuída a capacidade volitiva no momento de cometer o crime, aínda que non conste unha diminución nas súas facultades intelectivas e podía distinguir o que está ben do que está mal.
Os peritos do Instituto Nacional de Toxicoloxía confirmaron o achado de perfil xenético compatible co do acusado, mesturado con sangue da vítima, nun calcetín que foi recuperado do cadáver de José Luis.
Tamén prestou declaración un antropólogo forense que indicou que a vítima presentaba 18 lesións na bóveda cranial, algunhas delas eran puñaladas e outras eran golpes co mango do coitelo.
Posteriormente, axentes da Garda Civil explicaron as investigacións levadas a cabo entre a tarde do 17 de xaneiro, cando a vítima foi vista con vida por última vez, e a noite do 22 de xaneiro, cando foi localizado o seu cadáver nun galpón anexo ás instalacións do hostal no que ambos vivían.
Na inspección do lugar do crime atopáronse salpicaduras de sangue na habitación da vítima, no corredor e nunha varanda, e segundo apunta a investigación da Garda Civil, o asasino trasladou o cadáver lanzándoo desde esa varanda do primeiro piso e, posteriormente, arrastrándoo ata o galpón.
Na quenda de conclusións, o fiscal rebaixou a súa petición de pena para o acusado de 17 anos de cárcere que pedía inicialmente a 14 anos, ao ter en conta a atenuante de confesión ademáis da de alteración psíquica.
O avogado da defensa mantivo, por unha cuestión formal, a súa petición de libre absolución e, subsidiariamente, en caso de condena, que se apliquen as atenuantes solicitadas polas acusacións.
O tribunal de xurado foi citado para este mércores, momento en que se lles entregará o obxecto de veredicto e as instrucións pertinentes. A partir de aí comezarán as deliberacións.
"LA VA A VOLVER A LIAR"
Ao termo do xuízo, dúas das irmás da vítima, Loli e Tere Faro, explicaron ante os xornalistas que "queríamos estar aquí porque estamos apoyando a Luis. Somos nueve hermanos, mi madre por desgracia falleció en el mismo año que él, no aguantó lo que le pasó. Él murió en enero y ella en noviembre del mismo año".
As irmás de José Luis Faro Fernández tamén se referiron á petición de condena que fai a Fiscalía "evidentemente, 14, 25, 50 nos va a parecer poco, porque eso no nos va a devolver a Luis".
Por último, advertiron de que o acusado é unha persoa "no apta para estar libre en la calle" e preguntáronse "qué pasará" cando salga de prisión.
"La va a volver a liar, de eso estamos seguras", lamentaron.
Relacionadas:
-
Catorce anos de cárcere para o home que matou un residente dun hostal de Mondariz
Por Redacción |
-
O xurado popular declara culpable de asasinato ao acusado de matar a coiteladas un home nun hostal de Mondariz
Por Oskar Viéitez & Mónica Patxot |
-
O acusado de matar a puñaladas o seu compañeiro nun hostal confesa a súa autoría
Por Oskar Viéitez |
-
Un xurado verá a próxima semana en Pontevedra o crime a puñaladas nun hostal de Mondariz
Por Redacción |