'Gañémoslle ao machismo', lema de Soutomaior para o 25N coa idea de romper co heteropatriarcado no deporte
Por Redacción
O ámbito do deporte centrará esta edición do 25N no Concello de Soutomaior. Rosana Martínez, concelleira de Igualdade; Manu Lourenzo, alcalde de Soutomaior; e Cristina García, responsable do Centro de Información á Muller, presentaban este venres a campaña que se desenvolverá con motivo do Día Internacional contra as Violencias Machistas.
O lema "Gañémoslle ao machismo" recolle o obxectivo da campaña destinada a denunciar as estruturas deportivas sometidas ao machismo e ao heteropatriarcado que exerce violencia contra as mulleres, impedindo que exerzan as súas disciplinas en igualdade de condciones cos homes.
Desde o sábado 18 de novembro ao venres 1 de decembro desenvolveranse diferentes actividades.
O sábado 18, ás 19.00 horas, o Multiusos de Arcade acollerá a mesa redonda 'A muller no deporte', coa participación de diversas mulleres relacionadas co mundo deportivo: María Araújo, xogadora profesional de baloncesto; Adriana Gámez, árbitra de fútbol; Ana González, ex xogadora do Deportivo da Coruña. A moderadora será a adestradora de voleibol, Natalia Bauly.
O sábado 25 desenvolverase a concentración ás 12.00 horas na Alameda de Tallo Río en condena das violencias machistas. Realizarase unha lectura do manifesto a cargo de varias deportistas locais. O acto finalizará co dúo Cinta Adhesiva cunha performance en Tallo Río.
Esa xornada, durante a tarde, a compañía teatral A Panadaría subirá a escena 'As que limpan', ás 20.30 horas no Multiusos de Arcade.
O 1 de decembro, ás 19.30 horas, a librería Loli de Arcade acollerá a presentación do libro 'Bambú', de Isabel Blanco. Durante este evento haberá un coloquio entre a autora e o público.
Relacionadas:
-
25N | Concentración para gañarlle ao machismo en Soutomaior
Por Redacción |
-
Un faladoiro sobre a muller no deporte, punto de partida do 25N en Soutomaior
Por Redacción |
-
O Goberno de Soutomaior contratará un proxecto para un gran espazo público na contorna do Concello
Por Redacción |
-
Aprobada en pleno a mellora das condicións do persoal municipal de Soutomaior
Por Redacción |