No San Martiño, a Boa Vila estará chea de castañas, chourizo e viño
Por Oskar Viéitez
O alcalde de Pontevedra, Miguel Anxo Fernández Lores, recibiu este xoves aos colectivos promotores dos magostos que se celebran no concello nesta fin de semana: Mirador de Monte Porreiro, a Asociación de Veciños de Eduardo Pondal que o organiza na Curtidoira; representantes veciñais da rúa Altamira; a Asociación Socio-Cultural do Burgo; O Centro Social A Pedreira, que monta en Mugartegui; e representantes veciñais do Vilar, que celebrarán o sábado 18 na parroquia de Ponte Sampaio.
No caso da rúa Altamira, é o segundo magosto que organizan no barrio. A xuntanza comezará a partir das 13:00 horas con castañas asadas, comida caseira que aporta a propia veciñanza, choripanes que foron "todo un éxito na pasada edición", e tamén haberá unha "alternativa vegana" e "non faltará o viño nin as cañas ben tiradas".
A festa estará amenizada pola actuación do grupo musical tradicional “Os Alegres”, a sesión discoteca a cargo de Non DJs Set e o músico Aladino Barros. Haberá tamén actividades lúdicas para os cativos: xogos tradicionais a cargo de “Ventos”, Obradoiro de grafitti urbana da man de Culebra Studio e Obradoiro de Terrarios Efímeros grazas a Estudo Bonobo.
O Concello de Pontevedra ten previsto cortar o tráfico rodado para poder celebrar a festa comodamente na rúa Altamira. Tamén aporta carpas, por si a climatoloxía o require, mesas e bancos.
MAGOSTO "POLA DEFENSA DA TERRA"
A partir das 20 horas, terá lugar na Praza da Pedreira outro magosto popular, neste caso está organizado polos colectivos A Pedreira, Burla Verde, Trepia e a Asociación pola Defensa da Ría (APDR).
Máis alá da festa popular, os colectivos convocantes queren darlle a este magosto unha compoñente reivindicativa, "de defensa do medio natural e da nosa cultura", que concretan no lema "Pola defensa da terra". Neste sentido, xunto ás castañas (que serán de balde), os chourizos e o viño e cervexa, haberá música ao vivo co grupo Polavila, foliada aberta á participación e postos de propaganda e material dos grupos organizadores.
No caso de que a choiva imposibilite a realización do acto, os organizadores adiarían o magosto para outra data que sería anunciada convenientemente.
PRAZA DA CURTIDOIRA
Como ven sendo habitual, a asociación veciñal de Eduardo Pondal mantén firme o seu compromiso coa potenciación dos costumes e festas tradicionais de Galicia e dentro desta recuperación e promoción da nosa cultura, celebran este sábado o seu tradicional magosto, "onde a castaña recupera a importancia que o millo e a pataca lle foron arrebatando nos últimos séculos".
A partir das 18:00 horas na Praza da Curtidoira. Haberá castañas asadas, chourizos ao viño, música popular, bailes e xogos.
O BURGO
O magosto da Asociación Socio-Cultural do Burgo comeza ás 8 da tarde diante do local social no número 2 da rúa Juan Bautista Andrade. Asaranse 40 quilos de castañas e repartiranse en cucuruchos de papel ós asistentes. No seu caso non servirán bebidas.
MONTE PORREIRO
A Praza de Europa, en Monte Porreiro, acollerá dende as 7 da tarde o magosto que organiza a asociación veciñal O Mirador con "castañas de balde ata fin de existencias",
PONTE SAMPAIO
No caso de Ponte Sampaio, o magosto que organiza no Vilar a Asociación cultural Carballeira será para o sábado 18 de novembro a partires das 8 da tarde con castañas de balde, e o viño e refrescos a prezos populares. Haberá un obradoiro de decoración de cabazas. Todo amenizado con música tradicional e tendo presente que "se tedes gañas de cantar, tocar ou bailar non o podedes perder, collede o voso instrumento e vinde participar desta fabulosa foliada".