Os populares acusan o alcalde de Soutomaior de "silenciar" o proxecto do parque-xardín cunha "improvisación"
Por Oskar Viéitez
O grupo municipal do Partido Popular no Concello de Soutomaior acaba de saír ao paso da proposta do BNG dun gran espazo público como alternativa ao Parque-Xardín que o anterior goberno local tiña previsto.
Dende o PP de Soutomaior mostráronse indignados por este anuncio que "nin sequera se mencionou no pleno no que foi aprobada a continuidade do gran Parque-xardín".
Neste sentido, a portavoz dos populares, Noelia Ocampo, asegurou que "o goberno de Manu Lourenzo tivo que improvisar un proxecto indefinido, ao darse conta do ridículo que fixo absténdose dunha iniciativa que beneficiará claramente á parroquia de Soutomaior".
Ocampo asegurou que o proxecto de Parque-Xardín "non conta con ningún informe desfavorable, todo o contrario xa que o proxecto superou o informe ambiental e conta cun informe favorable de Patrimonio".
Asegura a voceira do PP que a iniciativa do anterior goberno tamén conta co plan especial de dotacións aprobado inicialmente, un documento no que se especifican as zonas diferenciadas do parque e o seu uso e que é fundamental para elaborar o proxecto técnico.