O goberno local destaca o aforro no custo desta edición da Festa do Mar de Combarro
Por Oskar Viéitez
Rexistradas xa no Concello todas as facturas da Festa do Mar que se celebrou en Combarro, o goberno local informa que custou 131.308 euros, o que supuxo un aforro de case 40.000 euros con respecto á edición anterior, que ascendeu a 170.000 euros.
O alcalde de Poio, Ángel Moldes, puxo en valor que este ano "fixemos moito máis e necesitamos menos recursos" polo que presumiu dunha "xestión eficiente" e de "control do gasto" escapando dos "despilfarros" e "sen renunciar nin á calidade nin ao contido".
Un terzo do orzamento da Festa do Mar deste ano foi para pagar as únicas dúas actuacións que deixou contratadas o goberno anterior, xa que os concertos dos Gabytos e o tributo a Michael Jackson custaron ás arcas municipais case 43.000 euros.
O resto de actuacións, incluídos os grupos das sesións vermú da fin de semana e os espectáculos das orquestras, tiveron un custo de 26.276 euros, sen contar o concerto de Roi Casal, que foi financiando pola Xunta de Galicia.
Nestes gastos da Festa do Mar tamén se inclúen as facturas derivadas do Certame de Canción Mariñeira ou da concentración de embarcacións tradicionais, así como a publicidade da festa, os gastos de seguridade, a instalación de carpas, decorados e iluminación.
Ángel Moldes indicou que o seu equipo de goberno tivo que organizar a Festa do Mar de Combarro sen orzamento, "porque en xuño as partidas de festexos xa estaban esgotadas" e que esta situación impediulles cumprir cos procedementos administrativos.
Relacionadas:
-
Convocado o consello veciñal de Poio para participar na elaboración dos orzamentos municipais
Por Redacción |
-
O Concello de Poio baixa un 5% o imposto de circulación e a taxa dos vaos
Por Oskar Viéitez |
-
Poio aposta por unha programación de Nadal "pensado para devolver a ilusión por estas festas"
Por Redacción |
-
Satisfacción en Poio polo éxito dunha Festa do Mar que "recuperou a súa esencia"
Por Redacción |
-
O primeiro vermú mariñeiro da Festa do Mar de Combarro foi "un éxito"
Por Redacción |