Sanxenxo promociónase na Feira de Turismo de Londres
Por Redacción
Un ano máis Sanxenxo participa na feira World Travel Market de Londres, unha das máis importantes do mundo, dentro da caseta de Turismo de Galicia.
Unha ampla delegación de Sanxenxo desprazouse á capital inglesa co obxectivo de aproveitar as conexións aéreas directas entre Londres e Galicia, potenciar no mercado británico a imaxe de marca de Sanxenxo e facilitar futuros acordos e posicionarse a nivel internacional.
Desde a delegación de Sanxenxo comentaron que a medio e longo prazo este destino tamén terá a oportunidade de "captar turistas ingleses que fuxan das noites tórridas e os días de máis de 40 graos que o cambio climático está a provocar no mediterráneo". Ademais, apuntaron que "os ingleses se interesan moito polo turismo de natureza e ornitolóxico, a gastronomía e o patrimonio".
Pero, neste momento, "queda moito traballo por facer" para incrementar a cifra de viaxeiros ingleses. Os datos indican que só o 9% dos visitantes de Sanxenxo proceden doutros países. Destacan portugueses e séguenlle, a moita distancia, franceses, alemáns e estadounidenses, mentres que a cifra de ingleses supón menos do 2% do total dos visitantes internacionais.