O Concello e a veciñanza de Campelo colaborarán para eliminar un punto de vertedura e crear miradoiros
Por Redacción
Eliminar un punto de vertedura e adaptar dúas zonas novas con miradoiros. Nestes obxectivos traballará a Asociación de veciños do Camiño do Castro, en Campelo, da man do Concello de Poio.
O alcalde de Poio, Ángel Moldes, reuniuse esta fin de semana con esta asociación e, tras escoitar a súa proposta, comprometeuse a colaborar con eles.
En primeiro lugar, procederase a eliminar un punto de vertedura incontrolada existente na parroquia, o que inclúe tamén acondicionar a zona para habilitar un miradoiro, con iluminación e unha varanda de seguridade. Xa para unha segunda fase deixarase a reposición dun camiño de acceso e adecuar outro miradoiro.
Moldes agradece a iniciativa dos veciños, e destaca que "estas actuacións, aínda que parecen pequenas, dan un gran servizo e contribúen a mellorar a calidade de vida das persoas que viven nesas zonas". E destacou que, precisamente, "esta é a filosofía do novo Goberno", isto é, "desenvolver proxectos consensuados cos veciños e que sexan participativos, porque eles mellor que ninguén coñecen cales son as principais necesidades de cada lugar".
Con esta actuación, engadiu, "seguimos a avanzar para eliminar eses puntos conflitivos onde de maneira moi puntual continúan vertendo voluminosos e outros aveños, mellorando a imaxe do noso concello e protexendo o medio ambiente. E, ademais, facémolo dándolle a volta, convertendo un vertedoiro nun miradoiro atractivo para veciños e visitantes".
Relacionadas:
-
Eliminado un punto de vertedura de augas residuais en Campelo cara á ría
Por Redacción | Creada e actualizada
-
Agardan ter en 2024 o abastecemento da auga regularizado e iniciar a constitución dun ente supramunicipal para a súa xestión
Por Oskar Viéitez & Mónica Patxot |
-
Perde o control do coche e estrélase contra a entrada dun restaurante en Lourido
Por Redacción |
-
Dous policías locais fóra de servizo deteñen unha agresión machista nun bar de Poio
Por Diego Espiño |