O Samaín Briz é xa para o Concello "o evento máis importante na nosa vila no outono"
Por Redacción
Cada ano que pasa o Samaín Briz se supera, e por iso desde o Concello de Marín valoran a edición celebrada o pasado 31 de decembro cun balance "tremendamente positivo".
Aseguran desde o goberno local que a popular e terrorífica festa "xa é o evento máis importante na nosa vila no outono", afirmou a concelleira de Festas, Marián Sanmartín.
Segundo o Concello a enorme oferta de actividades do Samaín Briz reduciu nesta ocasión considerablemente os tempos de espera nas colas para as rutas, un dos principais atractivos da celebración.
"Só é posible e non fai máis que mellorar grazas á incrible colaboración e implicación dos colectivos que a traballan conxuntamente connosco: a Fundación Juan XXIII, La Peña e Os da Caña. Para estes últimos queremos ter un especial agarimo e mención porque tiveron unha moi mala noticia familiar no propio día do evento e aínda así estiveron ao pé do canón", explicou Sanmartín sobre unha edición á que tamén se sumaron a pontevedreses Cor Café e Val do Lérez.
Desde a organización aseguran ademais estar satisfeitos coa acollida dunha das novidades este ano, o PequeSamaín, aínda que en aras de mellorar avanzan que se valorará unha nova localización máis accesible para futuras ocasións.
Ademais, desde o momento no que se abriron as portas, notouse tamén "unha gran implicación da xente, que veu case na súa totalidade disfrazada, que participou dos roteiros, que consumiu nos postos das Anpas, asociacións e Ong e que, en definitiva, está a facer o Samaín Briz seu", defendeu a edil de Festas.