En Poio, populares e socialistas acúsanse mutuamente de mentir
Por Oskar Viéitez
Duro enfrontamento entre os concelleiros do Partido Popular e do Partido Socialista no concello de Poio pola tramitación dos expedientes urbanísticos por parte do anterior goberno municipal BNG-PSOE-Avante.
A actual concelleira de Urbanismo do Concello de Poio, Rocío Cochón, do Partido Popular, entregou un resumo dos máis de 600 expedientes relacionados con Urbanismo abertos á data das eleccións do 28 de maio, previa á saída do anterior Goberno.
A listaxe, resumido por tipoloxías, inclúe 638 expedientes, dos que 115 eran de licenzas urbanísticas (205); 95 procedementos sancionadores (15%); 83 expedientes de Comunicacións e Declaracións (13%); outro 13% de Protección da Legalidade Urbanística e o resto repartido en distintas tipoloxías.
Cochón destacou "a desastrosa herdanza" na área de Urbanismo que levaba o concelleiro socialista Gregorio Agís, cun "legado" que é "a mellor demostración do fracaso de Gregorio Agís como concelleiro e a mellor explicación do seu fracaso como candidato".
A concelleira do PP afirmou que "baixo calquera análise, Agís foi o peor concelleiro de Urbanismo da historia", xa que "non levaba unha xestión responsable, como demostran os números, e iso levouno a ser o peor candidato posible, xa que se xuntou con outro partido e sacou peor resultado xuntos que por separado".
Cochón subliña que para Agís os 638 expedientes que había en xullo eran "un número normal" e ironiza con que "o portavoz socialista pretende ‘cambiar de opinión’ ou mentir tantas veces como o seu xefe Pedro Sánchez".
Pola súa banda, para o Partido Socialista a sesión plenaria do mes de outubro "serviu para deixar en evidencia as mentiras e a incapacidade de xestión do Goberno de Ángel Moldes e, máis concretamente, da edil de Urbanismo, Rocío Cochón, a quen o grupo municipal do PSdeG-PSOE descubriu manipulando a realidade de maneira flagrante".
O PSOE sinala que Cochón acusou a Gregorio Agís de deixar 600 expedientes "sen resolver" algo que entenden como "insólito que unha dirixente falte á verdade de maneira tan obscena".
"Sabemos que o PP de Poio xoga coa mentira e as medias verdades, pero asegurar que un expediente aberto na plataforma de xestión equivale a estar paralizado ou sen resolver é algo moi grave", xa que, segundo Agís, os expedientes continúan abertos despois do outorgamento de licencia hasta que este conclúa anos despois.