Intervención advirte do "elevado número de facturas" sen tramitar no Concello de Marín
Por Oskar Viéitez
Un informe do Servizo de Intervención municipal do Concello de Marín, desvelado polo grupo municipal do PSOE, alerta do "elevado numero de facturas pendentes de tramitación por inexistencia de crédito".
Os socialistas marinenses alertan do "alarmante descenso do remanente de diñeiro municipal, que pasou de máis de 4 millóns a menos de 500.000 euros en aproximadamente dous anos, e o incremento igual de importante da débeda municipal".
Segundo sinalan, este informe está relacionado cunha recente modificación de crédito xa aprobada polo goberno local e nel advírtese de que "á data de emisión deste informe constan un elevado número de facturas pendentes de tramitación por inexistencia de crédito. A modificación orzamentaria que se está a informar non solventará esta circunstancia dado o importe das facturas pendentes de tramitación e as facturas que previsiblemente se devenguen ata final do exercicio".
O Partido Socialista anuncia que "solicitaremos a información oportuna ao goberno local para saber o número e o importe dese elevado número de facturas no caixón que están pendentes de tramitación por parte do goberno municipal".