O Concello pagará 30.700 euros ao Club Naval por catro amarres a 10 anos
Por Oskar Viéitez
O Concello de Pontevedra subscribiu un convenio co Club Naval, polo que abonará un total de 30.700 euros por catro amarres no seu pantalán no río Lérez.
A Xunta de Goberno Local do Concello de Pontevedra aprobou a adxudicación pola que pagará 30.700 euros durante un período de dez anos.
Este acordo pon fin ao conflito aberto entre o Club Naval e o Concello de Pontevedra polo uso dalgúns amarres do club deportivo por parte do corpo municipal de Bombeiros e Protección Civil.
O Club Naval ordenara a retirada das embarcacións de Bombeiros dos seus pantaláns despois de solicitar sen éxito a rebaixa do IBI municipal, que supera os 8.000 euros anuais. O Club Naval dispón dunha concesión da Dirección Xeral de Costas que está vixente ata maio do ano 2033.