A examen os parques municipais de Soutomaior para estudar a súa rehabilitación
![Oskar](/web/cache/scene/uploads/xornalistas/foto/b40/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/573b7bbf54-perfil.jpg)
Por Oskar Viéitez
O Concello de Soutomaior está a levar a cabo nos últimos días unha auditoría nos 18 parques cos que conta o municipio. O obxectivo é estudar o estado no que estes se atopan e a súa adecuación ás normativas e lexislación vixentes, de cara a deseñar un proxecto de rehabilitación e adaptación dos parques á realidade actual.
O concelleiro de Urbanismo, Pablo Garrido, quen estes días supervisou a auditoría que se está a levar a cabo, indicou que "o estado no que se atopan a práctica totalidade dos parques municipais é lamentable, tanto na súa conservación como no seu mantemento".
O edil sinala que "isto supón un serio risco para os rapaces e rapazas que acoden a estes parques e desloce a imaxe que Soutomaior traslada ás familias que veñen ao concello cos seus fillos e fillas".
A auditoría impulsada polo Concello de Soutomaior tamén servirá para poñer en marcha outra das liñas de actuación do goberno municipal: apostar polo fomento da inclusión e a igualdade en todos os ámbitos do concello. Neste sentido, a rehabilitación dos parques de Soutomaior levará aparellada consigo a mellora da sinalización nestes, conseguindo adaptala a todas as persoas, sexa cal sexa a súa diversidade funcional. A intención do Concello de Soutomaior é que toda a rapazada poida desfrutar dos parques "de maneira comprensible e autónoma".
O alcalde de Soutomaior, Manu Lourenzo, sinalou que "o goberno xa está a estudar as posibilidades de adquirir xogos e equipamentos que favorezan a inclusión e garantan que calquera neno ou nena, sexa cal sexa a súa diversidade funcional, poida desfrutar no parque e pasar un rato agradable coas súas amizades". "O goberno de Soutomaior ten en mente adaptar os espazos recreativos do concello para o uso e desfrute de toda a veciñanza", concluíu o alcalde Manu Lourenzo.
PARQUE-XARDÍN
Por outra banda, o PP de Soutomaior celebra que o proxecto do gran parque-xardín de 11.000 metros cadrados iniciado no anterior mandato siga en pé. O Pleno do Concello decidiu seguir adiante co gran proxecto.
A portavoz municipal do PP, Noelia Ocampo, destacou a importancia deste espazo que ofrecerá unha "alternativa de lecer ás familias da zona e un punto de referencia que atraerá xente das zonas limítrofes, co que iso supón para o comercio local".