Loito entre os farmacéuticos pontevedreses polo falecemento da súa presidenta, Alba Soutelo
Por Redacción
O Colexio de Farmacéuticos de Pontevedra informa do falecemento este venres 27 de outubro da súa presidenta, Alba Soutelo Soliño.
"A profunda tristeza é patente entre os colexiados, os membros da xunta de goberno e os empregados do Colexio, a cuxa fronte estivo os últimos 13 anos", manifesta nun comunicado o Colexio de Farmacéuticos de Pontevedra.
Licenciada en Farmacia pola Universidade de Santiago e diplomada en Óptica e Optometría pola Universidade de Granada, presidía o Colexio de Farmacéuticos de Pontevedra desde o ano 2009. Así mesmo, estaba á fronte da súa propia farmacia na rúa Camelias de Vigo, localidade que a viu nacer en 1961.
Os seus compañeiros colexiais destacan de Alba Soutelo "a súa humanidade, capacidade de traballo, a súa dedicación á institución e á súa profesión, e o seu orgullo de ser farmacéutica, do que presumía en calquera ocasión".
"Neste momento de tristeza para toda a profesión farmacéutica, os membros do Colexio de Farmacéuticos de Pontevedra agradecen en nome da familia de Alba as mostras de agarimo que se están recibindo dende todos os puntos de España e dende todos os ámbitos”, remata o comunicado.