Todas as instalacións deportivas municipais de Sanxenxo terán desfibriladores
Por Redacción
Os campos de Baltar de Arriba, Baltar, Noalla e O Revel contarán, a partir de agora, con desfibriladores nas súas instalacións para maior seguridade dos seus usuarios.
O Concello, que investiu 7.000 euros na compra destes aparellos, entregoullos este xoves aos presidentes dos clubs de fútbol do Sanxenxo, Noalla, Vilalonga e Portonovo para que os instalen nun lugar visible e accesible.
Ata o de agora, só había desfibrilador no campo de San Pedro e nos pavillóns de Vilalonga e Baltar. Así todos os espazos deportivos municipais quedarán cardioprotexidos.
"A intención do goberno é continuar cunha instalación progresiva polo resto de edificios municipais", explicou o edil de Deportes, Marcos Guisasola, que lembrou que doce praias do municipio tamén contan con eses dispositivos.
Este proceso irá acompañado da formación por parte do servizo de Emerxencias de Sanxenxo dos adestradores e presidentes dos clubs municipais para que poidan realizar un uso adecuado e eficaz.