O Samaín de Soutomaior adíase ata o 4 de novembro polo mal tempo
Por Redacción
A gran festa que polo Samaín está a organizar o Concello de Soutomaior terá que esperar. O mal tempo previsto para esta fin de semana obrigou ao goberno municipal a adiar a súa celebración, prevista para este sábado 28 de outubro. Atrásase unha semana, ata o 4 de novembro.
A mala climatoloxía imposibilita o desenvolvemento de moitas das actividades previstas para a xornada, como o espectáculo de Hípica Celta, que non se pode levar a cabo nun espazo interior.
Debido a este cambio, amplíase o prazo de inscricións para o concurso de doces e sobremesas de Samaín. As asociacións de veciños poderán rexistrarse ata o vindeiro 31 de outubro.
A celebración do día 4 de novembro será nos mesmos termos que a xa establecida para o 28. Desenvolverase todo nos mesmos escenarios e haberá as mesmas actividades e espectáculos
O único cambio é a data debido as inclemencias meteorolóxicas para a xornada deste sábado.
O resto do Samaín seguirá segundo o previsto e, deste xeito, o domingo aterrará no Multiusos de Arcade o Escape Room Especial Samaín. Libera á pantasma! , ao que os interesados se poden apuntar ata este xoves 26 de outubro.