A contribución pontevedresa cos novos alimentos como fungos, insectos, algas ou carne cultivada
Por Oskar Viéitez
A firma biotecnolóxica pontevedresa Hifas da Terra participa no proxecto de innovación AccelerEAT xunto a outras 17 empresas da industria agroalimentaria.
Este proxecto investiga a produción de novos alimentos que xeren unha menor pegada ambiental debido ao uso de materias primas alternativas ou melloradas respecto ás convencionais como, por exemplo, novas variedades de plantas, insectos, microalgas, fungos, proteína microbiana, carne de cultivo celular etc.
Todos estes alimentos obteríanse a través de procesos innovadores e sostibles de trasformación industrial como a impresión 3D de alimentos, fermentación avanzada, extrusión, agricultura celular, upcycling de subproductos, e tamén de procesos auxiliares como a xestión sostible de auga, residuos e enerxía, dixitalización e actuacións transversais en rastrexabilidade.
Hifas da Terra é unha empresa radicada na parroquia de Bora e que foi creada por Catalina Fernández e Esteban Sinde como spin off da Universidade de Santiago de Compostela.
Foi premiada en 2016 polo Goberno co premio Alimentos de España na categoría de produción ecolóxica, e agora ven de recibir do PERTE Agroalimentario preto dun millón de euros para seguir innovando na procura de novos alimentos e ingredientes.
O delegado do Goberno en Galicia, Pedro Blanco, visitou ás instalación desta empresa en Bora e alí destacou que o proxecto de innovación AccelerEAT conta cunha axuda de 18,8 millóns de euros do Goberno (17,6 millóns en forma de subvención e 1,2 millóns nun préstamo sen interese) que permitirá mobilizar un investimento total de 48 millóns de euros ata xuño de 2025.
"Este é un exemplo máis de que os fondos do Plan de Recuperación do Goberno chegan ás empresas galegas e fano para transformar a nosa economía cara un modelo máis dixital e sostible", sinalou Pedro Blanco.
O PERTE AGROALIMENTARIO
O PERTE (acrónimo de proxectos estratéxicos para a recuperación e transformación económica) Agroalimentario mobiliza preto de 2.000 millóns de euros en axudas a través das súas diferentes convocatorias que xestionan os Ministerios de Industria, Agricultura e Ciencia. A primeira destas convocatorias foi xestionada polo Ministerio de Industria, Comercio e Turismo e nela foron seleccionados 4 proxectos nos que participan empresas de Galicia.
Así, ademais de AccelerEAT, figuran o proxecto SMARTZ4MILK, liderado polo grupo Lence, que busca mellorar a trazabilidade do leite e do que forman parte 8 empresas; Graperte, promovido pola Federación Española do Viño con 19 empresas, entre elas tres adegas galegas (Martín Códax, Terras Gauda e Viña Costeira), e o proxecto FG2H-From Green to Healthy, no que participan as galegas CEAMSA e Rotogal dun total de 25 empresas.