Soutomaior renuncia á subvención para rehabilitar o colexio da Oliveira para non poñer en risco a estabilidade orzamentaria
Por Oskar Viéitez
O Concello de Soutomaior renuncia á subvención para rehabilitar o colexio da Oliveira "para non comprometer de maneira moi grave as arcas municipais".
Esta decisión atende á recomendación que lle fixeron ao goberno local os informes ténicos emitidos pola enxeñería ‘Cendón-Vázquez arquitectos SCP’ e pola arquitecta municipal, o asesor xurídico e a secretaria municipal.
Segundo comunicou o goberno local, estes catro informes tamén aconsellan reformular a actuación no edificio "co obxectivo de presentar un proxecto serio e que responda verdadeiramente ás necesidades da veciñanza e ás circunstancias da Oliveira".
As conclusións dos técnicos coinciden en que o anteproxecto deseñado polo anterior goberno "non conta cos estándares mínimos como para garantir que a obra poida ser levada a cabo nos prazos establecidos".
Neste sentido, as previsións orzamentarias deste anteproxecto están "totalmente desfasadas" e, de seguir adiante a actuación na Oliveira, o sobrecusto para o Concello de Soutomaior podería ser como mínimo dun 20%, "poñendo en serio risco a estabilidade económica".
Ademais do "sobrecusto desproporcionado da obra", os informes tamén reflicten a imposibilidade de rematar a obra a tempo para cumprir o período de concesión da subvención, que ten como data límite setembro de 2024. "O deficiente anteproxecto desenvolvido polo anterior goberno fai imposible cumprir ese prazo xa que a licitación do proxecto quedou deserta ata en dúas ocasións".
O anterior equipo de goberno do alcalde Agustín Reguera tiña a intención de crear un viveiro de empresas nunha planta do antigo colexio de Oliveira. Ademais a reforma do edificio tamén contemplaba locais para os colectivos veciñais e dúas salas multiusos. O orzamento alcanzaba os 630.000 euros, a metade con fondos Next Generation.
O concelleiro de Obras, Pablo Garrido, lembrou que esta subvención, de case 300.000 euros, súmase aos máis de 400.000 euros do ReacPon e aos máis de 460.000 euros do PON2030 que o anterior goberno perdeu no último ano. "Case un 1.200.000 euros en subvencións perdidos polo anterior goberno que non poden ser destinados a obras e actuacións que melloren a vida da veciñanza de Soutomaior".
Pola súa parte, o alcalde Manu Lourenzo explicou que "o goberno de Soutomaior está xa a traballar nun novo proxecto para o colexio da Oliveira que non comprometa a estabilidade económica do concello".
"Imos elaborar un proxecto serio e estruturado, que se adapte ás circunstancias da Oliveira e que poida presentarse a futuras convocatorias de subvencións coa garantir de cumprir os seus obxectivos. Imos sacarlle o máximo proveito a todo o potencial do edificio e a súa contorna para que sexa un espazo de referencia en Soutomaior", declarou o alcalde.