Os escolares expoñen os seus carteis para promover a doazón e os transplantes
Por Mónica Patxot & Oskar Viéitez
A entrada principal do Hospital Provincial de Pontevedra acolle dende este martes a exposición itinerante do V Concurso de Carteis para Escolares relacionado coa Doazón e os Transplantes.
Esta mostra foi inaugurada este martes pola directora asistencial da Área Sanitaria de Pontevedra e O Salnés, Susana Romero Yuste, acompañada polo presidente da Asociación de Doantes e Receptores de Órganos de Vigo (ADROVI), Celso García Estévez, quen promove esta iniciativa na que tódolos anos participan centos de alumnos galegos dos niveis de Educación Primaria e ESO.
No transcurso desta inauguración fíxose entrega do primeiro premio na categoría do primeiro ciclo da ESO aos alumnos Ainara Solla González e Daniel Acuña Acuña, ambos do colexio Sagrado Corazón de Xesús da cidade de Pontevedra, que presentaron o debuxo titulado "Doa tempo". Para este traballo contaron co apoio do seu profesor José Estarque Moreno.
Con esta iniciativa, o Servizo Galego de Saúde e a Axencia de Doazón de Órganos e Sangue, xunto coas consellerías de Sanidade e de Educación, buscan achegar a realidade dos transplantes á poboación escolar, para que os rapaces poidan valorar os beneficios do fomento da doazón de órganos.
Relacionadas:
-
'O Abrigo' reúne unha serie de xilografías estampadas de xeito manual polo alumnado de Belas Artes
Por Redacción |
-
35 quilómetros desde Vigo a Pontevedra para demandar doazóns de médula ósea e de sangue do cordón umbilical
Por Redacción |
-
Máis de 650 persoas camiñan desde Vigo a Pontevedra para loitar contra a leucemia
Por Redacción |