Non era unha xestión de débedas, era unha estafa
Por Redacción
Axentes da Policía Nacional pertencentes á Comisaría Provincial de Pontevedra, lograron identificar un individuo de 47 anos de idade, natural de Asturias como presunto autor dunha falta de estafa.
Así aconteceu nun dos casos detectados o día 15 de xaneiro, cando presentou denuncia en dependencias policiais unha veciña da Coruña que foi vítima desta estafa.
Segundo informan fontes oficiais da Comisaría pontevedresa, a muller tería contactado con este individuo tras ler este anuncio nun xornal: "Pontevedra-Préstamos. Compramos deudas cualquier necesidad" e un teléfono móbil.
A súa operación consistiría en tramitar unha tarxeta por un importe de 2.500 euros nunha coñecida entidade bancaria.
A muller concertou unha cita con este individuo na estación de autobuses da cidade de Pontevedra e a cambio de tramitarlle a tarxeta o individuo solicitoulle 450 euros, 350 euros para o director da sucursal e 100 para el en concepto de comisión, ademais de diversa documentación que a denunciante lle entregou como fotocopia do DNI, contrato de traballo, entre outras.
Tras entregarlle a documentación o individuo esixiulle o diñeiro para realizar a xestión e se ben a muller nun primeiro momento se resistiu a entregarlle o diñeiro, dada a necesidade que tiña da tarxeta entregoulle finalmente 400 euros.
O individuo díxolle que nuns 25 minutos a chamaría para asinar a póliza pero non volveu e aínda que intentou en varias ocasións contactar con el non logrou localizalo.