Os socialistas acusan a María Ramallo de impulsar "unha das maiores subidas de impostos" na historia de Marín
Por Redacción
A decisión do goberno municipal de Marín de subir en 2024 os impostos do IBI e da viñeta non gustou nas filas socialistas. O seu portavoz, Manuel Pazos, acusa á alcaldesa de impulsar "unha de maiores subidas de impostos" na historia de Marín.
Censura que Ramallo pasase de "repetir constantemente" o bo estado das contas municipais a anunciar un incremento da presión fiscal, o que ao seu xuízo evidencia o "descontrol" nas arcas municipais e unha "brusca viraxe" na política económica.
Os motivos desta decisión, segundo o PSdeG-PSOE, serían por unha banda os "gastos faraónicos" que supoñen obras como o futuro auditorio "para os que Marín non ten recursos suficientes", a piscina de auga salgada, a reforma do paseo Alcalde Blanco ou o renovado viario de praias.
A iso, Manuel Pazos suma a "política electoralista e partidista" de non tocar os impostos ata pasar as eleccións municipais, o que provocou que o desfasamento orzamentario entre ingresos e gastos "chegase a niveis perigosos".
Para corrixir esa situación, sostén o edil socialista, hai que aprobar unha subida "moito ampla e máis intensa do que sería necesario", medida agravada pola subida de prezos tras a guerra de Ucraína e a actual inflación.