A Audiencia impón penas mínimas para os involucrados nunha pelexa nun bar de Caldas
Por Oskar Viéitez
Cun acordo de conformidade resolveuse este xoves na Audiencia de Pontevedra o xuízo contra un home e unha muller involucrados nunha pelexa nun bar de Caldas de Reis.
O fiscal solicitaba para ambos implicados penas de prisión que ían entre os catro anos e os dous e medio ao considerar aos dous acusados autores dun delito de lesións con deformidade, no caso dela coa circunstancia eximente incompleta de lexítima defensa.
En virtude do conformado en Sala polas partes, ambos recoñecen a súa participación nos feitos e el acepta unha pena de 3 meses e ela de 2 meses renunciando ambos á responsabilidade civil.
Considéranse probados os feitos recollidos no escrito de acusación no que se relata que sobre as 21:45 horas do 23 de outubro de 2021 nun bar de Caldas de Reis orixinouse unha forte discusión entre a propietaria e a súa parella sentimental na que el comezou a agredila a ela. Por estes feitos, séguese outra causa xudicial.
Nese momento, unha muller saíu do baño e, ao ver a agresión, decidiu intervir tratando primeiro de apartar ao agresor, o primeiro acusado. El revolveuse contra ela e golpeouna na cara. Nese momento, ela colleu unha copa que había nunha das mesas e estampoulla na cabeza.
Como consecuencia destes feitos, a muller sufriu unha ferida na cara pola que quedou unha cicatriz de tres centímetros e el unha ferida na cabeza polo que quedaron, como secuelas, dor neuropático a nivel de cicatriz.
Para o acusado home, pídenlle catro anos de prisión e para a acusada muller, dous anos e medio de prisión.