Pleno bronco en Vilagarcía: O BNG abandona a sesión e os edís de IU quedan pechados
Por Oskar Viéitez & Aitana Vidal
Os dous concelleiros do grupo municipal de Esquerda Unida no concello de Vilagarcía, Juan Fajardo e Ramón Bueno, pecháronse no salón de plenos durante 24 horas como medida de protesta pola non inclusión na orde do día de dúas mocións que presentou "en tempo e forma".
Non foron os únicos afectados pola decisión do goberno local de rexeitar a inclusión de mocións tipo na orde do día, ao Partido Socialista excluíronlle unha moción e ao BNG tres, motivo este polo que os edís nacionalistas abandonaron o salón de sesións antes de que se cumprise a primeira hora do pleno.
Sen estar na orde do día, a discusión sobre o control selectivo de mocións, tratouse ao principio do Pleno como "cuestión de orde".
A voceira nacionalista, María Villaronga, explicou que se ían "ao non recibir explicacións coherentes e convincentes sobre o porque desta actitude antidemocrática", cualificando a decisión do Partido Popular de "atentado" e á actitude do rexedor como "fascista".
Dende Esquerda Unida díxose que con esta medida "queda claro que a democracia está suspendida con leis mordaza e ao furtar ou debate dous que representamos a preto de 10.000 veciños deste municipio", en referencia dos votos recibidos por toda a oposición nas últimas locais.
A voceira socialista, Tania García, reprochou aos populares unha estratexia de furtar o debate democrático, recordando que asuntos "como a Leis do aborto ou os problemas enerxéticos son de interese e preocupación dos veciños, isto é unha deterioración das formas democráticas".
Pola súa banda o alcalde, o popular Tomás Fole, xustificou a súa iniciativa "en aras de un mejor trabajo de la corporación" e replicou que son os tres grupos da esquerda os que manteñen unha estratexia de "acoso y derribo" ante as intervencións de calquera membro do goberno local "llevando la contraria como forma de vida".