Os bombeiros do Morrazo teñen que desprazarse a un incendio en Ribadumia por falta de medios no Salnés
Por Natalia Puga
Os Bombeiros do Morrazo tiveron que desprazarse na tarde do martes a Ribadumia para axudar nas tarefas de extinción dun incendio ante a falta de medios na comarca do Salnés, pois os parques de bombeiros de Ribadumia e de Vilagarcía estaban pechados.
O incendio comezou sobre as 18.00 hora nun terreo con madeira acumulada, restos dunha antiga carpintería, na Rúa de Barroso de Ribadumia.
Segundo a información facilitada polo 112 Galicia, na contorna había máis casas e o risco da propagación obrigou a organizar unha resposta conxunta con efectivos de extinción e axentes forestais.
Os equipos lograron controlar o incendio sobre as oito da tarde mediante o movemento do entullo e a redución da carga térmica causada polo tipo de material en combustión.
Finalmente, ardeu moita madeira, pero a contorna conseguiu salvarse.
Neste operativo, participaron os membros do GES de Sanxenxo, Bombeiros do Morrazo, axentes forestais e o apoio dunha nodriza.
Tamén colaboraron axentes da Policía Local de Cambados e da Garda Civil.
Os axentes foron os primeiros en que chegar ao lugar tras as chamada dunha veciña e alertaron a través do 112 Galicia para a organización desta intervención.