16 comercios de Pontevedra exhibirán nos seus escaparates as creacións dos alumnos de Belas Artes
Por Redacción
Un grupo de alumnos de Belas Artes exhibirán as súas creacións nos escaparates dos 16 comercios de Pontevedra que participan na exposición Red dot.
Organizada pola estudante Antía Rivas como un traballo para a materia Xestión, Ámbito Artístico e Mundo Cultural, que imparte o profesor Xosé Manuel Buxán, esta mostra colectiva preséntase como unha fórmula alternativa para amosar á cidadanía o traballo do alumnado da facultade, que exhibe as súas obras a modo de carteis nos escaparates ou no interior dos comercios participantes.
Rivas colocou un punto vermello cos datos da obra e do autor como símbolo identificador de cada un destes carteis. Así mesmo, elaborou como complemento da iniciativa un pequeno mapa, que se distribuíu polos establecementos participantes, no que se sinala a localización dos diferentes negocios que participan nunha exposición que se estenderá ata 30 de xaneiro.
"ÿ unha maneira de unir á facultade coa cidade, de amosar dunha maneira accesible o que se fai dentro da Universidade", apunta Judith Cerqueiro, unha das participantes nesta exposición, que ve como "unha oportunidade de dar a coñecer a artistas emerxentes que se están formando".
Os comercios que participan na iniciativa son: El Precio Justo, as dúas tendas de Ernesto Filgueira, Papelería Cao, Alfonso Sastre, La Casa Winchester, a Libraría Metáfora, a boutique Isabel, a tenda de comercio xusto Amarante Setem, Playground Store, Libraría Cao, Droguería Moderna, Farmacia Estebán, Ferraxería Varela, Carnaby e na Ecotenda Terra Alternativa.