O plan de rozas de Poio suma xa medio millón de euros este ano para dar maior seguridade aos viais
Por Redacción
O Concello de Poio leva investidos no que vai de ano máis de medio millón de euros en traballos de roza no municipio, un plan de actuacións que inclúe limpeza de cunetas, retirada de maleza e poda e posta a punto de árbores e sebes.
O obxectivo destas actuacións é garantir a seguridade e mellorar a mobilidade.
Trátase dun plan de roza coordinado para chegar a todos os lugares de Poio, pero o concelleiro de Obras, Servizos, Parques e Xardíns, Marcial García, recoñece que "é complicado facer todo ao mesmo tempo", pois os traballos están condicionados pola dispersión territorial de Poio e pola climatoloxía. Así, a combinación de precipitacións e temperaturas favorece o crecemento de vexetación.
"Somos conscientes de que é un servizo esencial, e traballamos coordinados para intentar chegar a todo coa maior axilidade posible", asegura o concelleiro, que engade que o seguimento é continuo e todas as zonas están perfectamente detectadas.
Nos próximos días, os traballos iniciaranse en Vilariño, Sartal e Aris, e posteriormente trasladaranse ás zonas de Samieira e Arén. Nas zonas urbanas, é a propia empresa de limpeza a que realiza os traballos, mentres que a Deputación de Pontevedra e a Xunta de Galicia fanse cargo nas vías que son da súa competencia.
Marcial García explica que o contrato coa adxudicataria non cubre nin o 40% das rozas que se fan ao ano, por iso é necesario completalo cos traballos doutros autónomos.
O traballo da adxudicataria do contrato de roza compleméntase con accións doutras empresas locais que actúan nas zonas de San Salvador, nos colexios e en Raxó, Samieira e outros traballos máis específicos.
Tamén a Fundación Juan XXIII acondiciona as zonas de Ankar, Lourido e A Reiboa e unha brigada de operarios municipais reforza os traballos.