Os veciños da Pontesa xa poden respirar tranquilos despois da retirada total do cereal acumulado na fábrica
Por Oskar Viéitez
O alcalde de Soutomaior, Manu Lourenzo, celebrou este martes a confirmación oficial de que xa se retirou todo o cereal almacenado na fábrica da Pontesa.
O gran, afectado polo incendio que arrasou parte do edificio o pasado mes de novembro de 2022, estaba a provocar problemas de insalubridade a 200 familias de Arcade e tamén da parroquia pontevedresa de Ponte Sampaio e afectaba a decenas de negocios de restauración e hostalaría do concello que agora xa poden respirar tranquilos.
O alcalde Manu Lourenzo sinalou que desde o primeiro momento o obxectivo prioritario para o goberno de Soutomaior era "solucionar canto antes os problemas derivados do incendio na Pontesa, porque a veciñanza levaba case un ano a aguantar malos cheiros e pragas de insectos e ratas".
O rexedor de Soutomaior asegurou que "sempre tivemos claro que a solución pasaba pola retirada do gran almacenado na nave, e así o fixemos saber en todas as xuntanzas de traballo que mantivemos coas administracións implicadas".
Neste sentido, o alcalde de Soutomaior, Manu Lourenzo, reivindicou o traballo levado a cabo polo goberno de Soutomaior desde o primeiro momento para que estes traballos de retirada de gran se levasen a cabo canto antes. Tras as reunións mantidas en xullo polo alcalde Manu Lourenzo coa Delegación Territorial da Xunta en Vigo e coa Dirección Xeral de Costas, "o prazo da retirada do gran pasou dun horizonte temporal de anos a só uns meses".
Por outra parte, o rexedor asegurou que o goberno local seguirá a traballar para que a situación se solucione por completo e todo volva á normalidade "para evitar novos problemas de insalubridade e de pragas de insectos e ratas".
"O goberno de Soutomaior comprométese a que non parará ata que as 200 familias de Arcade afectadas e os negocios de hostalaría e restauración da zona recuperen a total normalidade no seu día a día", asegurou o alcalde.
Relacionadas:
-
Presentadas tres reclamacións diferentes polo incendio da nave de Pontesa
Por Oskar Viéitez & Mónica Patxot |
-
Unha aseguradora reclama ao Concello 7 millóns de euros por "neglixencia" dos bombeiros no incendio de Pontesa
Por Alejandro Espiño |
-
"Fartos dos cheiros e das pragas" nove meses depois do incendio de Pontesa, os veciños claman solucións
Por Natalia Puga & Mónica Patxot |
-
O alcalde de Soutomaior busca solucións ás pragas de insectos e ratas na fábrica da Pontesa
Por Oskar Viéitez |
-
Mariscadoras e representantes da confraría de Arcade trasladan a súa preocupación pola situación da fábrica de Pontesa
Por Juan Manuel García Tajes & Redacción |