Falece un coñecido hoteleiro de Sanxenxo de 87 anos nun atropelo nun paso de peóns
![Natalia](/web/cache/scene/uploads/xornalistas/foto/9b5/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/577f8fbb69-hkm23_ri.jpg)
Por Natalia Puga
José Troncoso Poceiro, coñecido hoteleiro de Sanxenxo de 87 anos, faleceu ao mediodía deste luns vítima dun atropelo na zona da Vichona.
O accidente produciuse sobre as 13.40 horas na estrada PO-504. Segundo informaron os servizos de emerxencias, o coñecido hoteleiro cruzaba por un paso de peóns cando un turismo bateu contra el e arrastroulo varios metros.
Desde o Concello de Sanxenxo confirman que o falecido, José Troncoso, é o propietario do Hotel Troncoso, situado nas inmediacións do lugar do accidente.
Ata o lugar do accidente desprazáronse efectivos do Grupo de Emerxencias Supramunicipal de Sanxenxo, a Garda Civil de Tráfico, a Garda Civil de Sanxenxo e a Policía Local.
Tamén se desprazou unha dotación de Urxencias Sanitarias de Galicia 061, que xa só puido confirmar o falecemento do peón.
Segundo a información facilitada pola Garda Civil de Pontevedra, o condutor do vehículo ten unha idade similar á da vítima e deu negativo nas probas de alcol e drogas.
Agora investigaranse outras circunstancias como a velocidade para determinar que puido ocorrer.