Ingresa en prisión o home detido por cravar unha navalla a outro en plena rúa
Por Natalia Puga
O Xulgado de Instruccióin número 2 de Pontevedra acordou este venres o ingreso en prisión provisional comunicada e sen fianza para o home detido na tarde do xoves por presuntamente apuñalar outro cunha navalla na contorna da rúa Riestra.
A Policía Nacional detívoo por homicidio en grao de tentativa, aínda que finalmente a orde de ingreso en prisión decretouse por un delito de lesións, segundo a información facilitada polo Tribunal Superior de Xustiza de Galicia (TSXG).
O home foi detido a media tarde do xoves en cálea Alameda e pasou a noite na Comisaría Provincial da Policía Nacional. A media mañá deste venres foi posto ao dispor xudicial. Na tarde deste venres, ordenouse o seu ingreso en prisión.
A detención deste home foi resultado dunha colaboración entre as policías Local e Nacional de Pontevedra e tivo a súa orixe nunha discusión previa por causas que se descoñecen. No transcurso da mesma, un golpeou ao outro. En resposta, o outro sacou unha navalla e atacoulle.
Outras fontes consultadas por este xornal indicaron que, antes desa discusión, xa se produciu unha pelexa previa na contorna de San Francisco e A Ferrería no que se viu implicado o agresor. Tras esa pelexa, atopouse coa súa vítima e produciuse a discusión.
Todo ocorreu sobre as 17.40 horas. Un cidadán alertou á Policía Local de Pontevedra pola presenza dun home na rúa Riestra cun coitelo na man e manchado de sangue que refería que matara a alguén e dirixíase cara á rúa da Alameda.
A persoa ferida foi localizada na rúa Gutiérrez Mellado. Trátase dun home sen teito moi coñecido en Pontevedra que tivo que ser trasladado ao Hospital Montecelo. O prognóstico é reservado, aínda que estivo consciente en todo momento e, en principio, non se teme pola súa vida.
Os policías localizaron ao presunto agresor na Alameda, á altura do Cafetín e procederon á súa detención. Trátase tamén dun home sen teito de orixe colombiana.