Localizan o ladrón dunha marmorería e recuperan dúas figuras de bronce escondidas nun supermercado
Por Redacción
A Policía Local de Vilagarcía de Arousa logrou resolver un roubo nunha marmorería situada na Praza Arcebispo Lago coa localización do seu suposto ladrón e a recuperación das dúas figuras de bronce roubadas.
Os propietarios presentaron denuncia na tarde do martes cunha descrición do sospeitoso e pouco despois os policías lograron localizalo. Trátase dun home de 49 anos que non foi detido, pero deberá responder xudicialmente polos feitos cometidos.
O sospeitoso camiñaba pola rúa San Roque esa mesma tarde e nun primeiro momento negou calquera relación cos feitos, pero logo dixo que lle regalaran as figuras e xa non as tiña porque as vendera.
Tras a insistencia dos axentes, pediulles que o acompañasen ata un supermercado situado na rúa San Roque, onde, escondidas xunto aos carros da compra, se atopaban as dúas figuras de bronce.
Tras isto acabou recoñecendo que se fixera coas mesmas tras arrancalas das pedras nas que estaban ancoradas no expositor da marmorería.