Un taller e unha ruta con xogos tradicionais galegos, plan para o sábado no Castelo de Soutomaior
Por Redacción
Este sábado 15 desenvólvese no Castelo de Soutomaior unha proposta familiar cun taller e unha ruta para descubrir xogos tradicionais galegos como as bólas ou a buxaina.
Esta actividade forma parte do programa 'Mouras e Meigas no Castelo de Soutomaior'. Instalaranse diferentes postos dentro do taller 'As cucañas' onde as persoas que asistan terán a oportunidade de descubrir as características de cada un dos xogos populares.
O programa 'Mouras e Meigas no Castelo de Soutomaior' ofrece propostas relacionadas coa mitoloxía da provincia.
O domingo 6 de agosto levará a cabo un taller sobre os oficios tradicionais e o 19 de agosto está prevista unha actividade infantil de cociña. Xa o 2 de setembro poñerase en marcha un obradoiro de vendima; o sábado 28 de outubro celebrarase o Samaín e, finalmente, o sábado 4 de novembro concluirá a programación cun Magosto.
As entradas para as actividades pódense adquirir a través de entradas.castelodesoutomaior.com. O prezo único é de oito euros, con entrada ao Castelo de Soutomaior incluída (5 euros). Cada unha das actividades establece 30 prazas.
A Deputación de Pontevedra tamén organiza 68 sesións de visitas guiadas ao recinto que teñen lugar os luns e venres do mes de xullo e de agosto, con tratamento de diversas temáticas ata finais de ano.