Juan Carlos Aladro proposto para ser o novo conselleiro maior do Consello de Contas
Por Oskar Viéitez
O Grupo Popular rexistrou este venres no Parlamento de Galicia a solicitude para a celebración dun Pleno extraordinario para a elección do candidato para a cobertura da vacante que deixa o actual conselleiro maior do Consello de Contas, propoñendo como novo conselleiro a Juan Carlos Aladro Fernández.
O Consello de Contas comunicou ao Parlamento de Galicia o pasado 14 de febreiro que, de conformidade co previsto na lei que rexe este organismo, o actual conselleiro maior, José Antonio Redondo López, esgota o seu mandato por razón de idade, polo que é necesario designar un substituto.
Diante desta situación, o Grupo Popular rexistrou a solicitude para iniciar o procedemento de substitución do conselleiro maior do Consello de Contas, para o que é necesario a convocatoria dunha sesión extraordinaria da Comisión 1ª, na que poida comparecer o candidato ao posto, e un Pleno extraordinario do Parlamento, para proceder á súa elección.
NOVO CONSELLEIRO
O Grupo Popular propón como novo conselleiro do Consello de Contas a Juan Carlos Aladro Fernández. Licenciado en Dereito pola Universidade de León e diplomado en Criminoloxía pola Universidade de Santiago, Aladro Fernández foi Fiscal xefe provincial de Pontevedra desde novembro de 2007 ata 2023. Con anterioridade, desenvolveu funcións de fiscal do destacamento de Vigo e de Cambados, así como avogado fiscal da Audiencia Provincial de Pontevedra.
Ademais de impartir e participar en numerosos cursos e seminarios a nivel nacional e internacional, Juan Carlos Aladro ten sido docente na Escola de Práctica Xurídica Concepción Arenal do Colexio de Avogados de Vigo, na Escola Galega de Seguridade e foi director da Escola de Verán do Ministerio Fiscal en Mariñán. Tamén ten realizado multitude de publicacións e ponencias.
Aladro Fernández é poseedor da Cruz Distinguida de 1ª clase de San Raimundo de Peñafort, da Cruz ao Mérito Policial con distintivo branco e da Cruz ao Mérito da Garda Civil.