Xosé Manuel González Abal reincorpórase no seu posto como intendente da Policía Local de Pontevedra
Por Oskar Viéitez
A Xunta de Goberno do Concello de Pontevedra deu conta da petición realizada polo director xeral de Persoal, Xosé Manuel González Abal, para reintegrarse no seu posto de traballo como intendente da Policía Local de Pontevedra.
O concelleiro César Mosquera informou dos asuntos abordados na Xunta de Goberno e neste caso sinalou que "foi unha petición propia que realiza o até o agora director xeral de Persoal e nós só podemos agradecerlle os servizos, pois cremos que fixo un gran traballo, mais prefire continuar coa súa carreira profesional".
Segundo indicou Mosquera, agora "teremos que valorar se buscamos substituto para esta praza. Doutra banda, debemos falar de alegría, xa que se reforza o staff directivo da Policía".
Mosquera sinalou que "é unha decisión persoal logo dun gran traballo, e de seguro realizará un bo traballo no seu posto como xefe de Policía".
ACORDO COA ATRIGA
Outro dos asuntos tratados na nomeada Xunta de Goberno foi aprobación do acordo entre Concello e a Axencia Tributaria de Galicia (Atriga) para a dispoñibilidade de datos dos contribuíntes.
Segundo César Mosquera, na práctica se traduce "en que calquera que queira facer un trámite neste Concello, no referido a licitacións ou subvencións, precisa non ter débedas tributarias nin co Estado, nin coa Xunta nin co Concello; agora poderá axilizar e evitar problemas que podían ser máis ou menos habituais".
O edil definiu esta medida como "técnica", mais que no día a día aportará diversas vantaxes aos veciños de Pontevedra na súa relación coa Administración.