Rematadas as obras en tres estradas provinciais en Cambados
Por Redacción
A Deputación de Pontevedra vén de rematar unha actuación conxunta para mellorar e garantir a seguridade viaria en tres estradas provinciais que transcorren por Cambados.
A intervención, na que a institución provincial investiu un orzamento de 165.000 euros, levouse a cabo nun tramo de 1,3 quilómetros que atravesa as estradas EP-9001 entre Castrelo e Couto de Abaixo; a EP-9002 entre Fefiñáns e Oubiña e a EP-9004 entre Corbillón e Tragove.
Deste xeito, actuouse nun treito de 650 metros na EP-9001; en 220 metros no caso da EP-9002 e en 450 metros da EP-9004. En todos eles realizáronse en primeiro lugar traballos de roza e limpeza de cunetas, noiros e terrapléns, así como o levantamento do firme, beirarrúas e cunetas de formigón nos treitos afectados.
Posteriormente executáronse os traballos de recheo, colocación de tubaxes, execución de cunetas e sumidoiros e o fresado do firme. Amais, as obras completáronse co pintado da sinalización viaria.