Paso en firme para modernizar e revitalizar a praza de abastos de Vilaxóan
Por Redacción
Converter a praza de abastos de Vilaxoán nun centro de atracción de comerciantes e de consumidores. Ese é obxectivo da reforma impulsada polo goberno municipal de Vilagarcía. Esta actuación acaba de saír a licitación cun orzamento de case 211.000 euros.
A rehabilitación integral deste espazo será financiada a través dunha achega do Plan Concellos da Deputación de Pontevedra e con fondos europeos da estratexia EDUSI.
Con este proxecto, a administración local pretende modernizar e revitalizar o mercado público vilaxoanés e dinamizar a actividade comercial e social da localidade mariñeira, acondicionando e optimizando o espazo para unha maior funcionalidade para os concesionarios e os clientes.
A actuación servirá para adaptar as instalacións da praza de abastos aos actuais requirimentos para os espazos dedicados á venda de alimentos e tamén á normativa de accesibilidade.
A intervención afectará aos 274 metros cadrados de superficie coa que conta o edificio e incluirá o deseño de novos postos, a redistribución dos existentes e a introdución doutras melloras tendentes a optimizar a actividade, aplicando criterios de sustentabilidade.
Trátase dunha reforma integral, que afectará tanto ao interior do inmoble -incluída a renovación das instalacións eléctrica e de fontanería-, como ao exterior, mellorando a imaxe do edificio.
No interior, a praza manterá os espazos laterais como postos de exposición, pero se eliminarán os que están pegados á fachada principal.
Os destinados actualmente á carnicería e á froitería gañarán espazo, no primeiro caso para un obradoiro, e no segundo para a instalación dunha cámara frigorífica. Os baños tamén se mellorarán para facelos máis accesibles ao todos os públicos.
Tendo en conta a altura do actual edificio, os restantes postos perimetrais emprazaranse nun nivel superior, disimulados cara ao exterior por unha malla "deployé" pregada e pintada en cor azul (en relación ao mar).
Por último, no espazo central da praza deixarase unha zona aberta, diáfana e polivalente onde se poderán instalar diferentes postos móbiles en función das necesidades de cada momento.
A actuación no exterior do edificio centrarase na mellora da imaxe e en resaltar a praza con elementos e cores inspirados no mar (branco e azul). Tanto por estética coma por funcionalidade, cambiaranse as portas e se pintará todo o edificio de branco.
A intervención completarase coa instalación na fachada principal do edificio -a que dá ao parque de Dona Concha- dun cartel retroiluminado co nome da praza que se colocará sobre un fondo cuberto cunha reixa imitando unha rede de pesca.
O prazo de execución das obras é de cinco meses. As empresas interesadas teñen de prazo ata o 19 de xullo para presentar as súas ofertas.
Relacionadas:
-
O reparto a domicilio da praza de abastos de Vilagarcía farase nun coche eléctrico
Por Oskar Viéitez |
-
As praceiras trasládanse á antiga panadería mentres duren as obras no Mercado de Vilaxoán
Por Redacción |
-
O mercado de Vilaxoán abrirase á venda de novos produtos tras a súa reforma integral
Por Redacción |
-
Vilagarcía reformará a praza de abastos de Vilaxoán
Por Redacción |