Morre unha muller tras chocar unha zódiac contra unha batea entre Vilanova e A Illa
Por Redacción
Unha muller de 53 anos perdeu a vida este sábado despois de que a embarcación zódiac na que viaxaba chocase contra unha batea entre Vilanova e A Illa de Arousa.
Xunto a ela ía un home que resultou ferido e foi trasladado en estado grave ao Hospital do Salnés, onde permanece ingresado.
O suceso, segundo informou o 112 Galicia, rexistrouse pouco despois das sete da tarde
Os servizos de emerxencia tiveron coñecemento do choque a través da alerta dun dos implicados no accidente e, enseguida, puxeron a situación en coñecemento do servizo de Gardacostas de Galicia e do persoal de Salvamento Marítimo.
Ambos os ocupantes da zódiac foron rescatados con vida por unha lancha de Salvamento Marítimo, pero a muller faleceu pouco despois.
No porto de Vilanova esperábaos unha ambulancia do 061, que trasladou ao ferido ao hospital.
Neste operativo participaron tamén axentes da Policía Local de Vilanova e a Garda Civil, efectivos dos Bombeiros do Salnés e membros de Protección Civil.