Moldes asegura que o goberno local de Poio "é máis barato que o anterior e reforza o papel dun único alcalde"
Por Oskar Viéitez
O Concello de Poio celebra o luns, ás 9.30 horas, o pleno de organización da nova corporación municipal, no que se declarará a constitución dos grupos municipais, e configurarase o novo Goberno municipal, presidido por Ángel Moldes.
A proposta é manter a celebración dos plenos municipais coa mesma periodicidade e horario que ata o de agora, o último martes de mes, ás 19.30 horas.
Con respecto ás comisións informativas, plantearase organizalas na comisión de Urbanismo, que estará presidida por Rocío Cochón; de seguimento do Plan Especial e do Catálogo de edificios e conxuntos do Concello de Poio, presidida por Cándido Muíños; de Educación, Cultura e Deportes, por Natalia Sabarís, e de Facenda, Gobernación e Contas, presidida polo alcalde, Ángel Moldes.
Na sesión tamén se inclúe a determinación das dedicacións exclusivas e parciais dos membros da corporación, así como o réxime das indemnizacións por asistencias e asignacións a grupos políticos.
"GOBERNO MÁIS BARATO QUE O ANTERIOR"
Con respecto ás dedicacións exclusivas e parciais, o Goberno actual asegura que "é máis barato que o anterior e reforza o papel dun único alcalde".
Deste xeito, Ángel Moldes terá un soldo bruto de 41.000 euros anuais, que inclúe as cotizacións á seguridade social, "unha cifra que contrasta cos tres soldos de alcalde no mandato pasado, que recibían 39.000 euros cada un", sinalan dende o grupo de goberno.
Con respecto ao resto do Goberno, ademais do alcalde recibirán unha dedicación exclusiva o edil delegado de Obras, servizos, parques e xardíns, cunha retribución bruta anual de 38.449,96 euros; unha dedicación parcial para a concelleira delegada de Urbanismo e Turismo, que desenvolverá o 70% da xornada e terá unha retribución bruta anual de 26.914,97 euros; e dúas medias xornadas para as edís de Educación e Cultura e Benestar e Igualdade, que terán unha retribución bruta anual de 19.224,98 euros.
Por iso, Ángel Moldes sinala que "o Goberno máis caro para os veciños de Poio foi o do último mandato co Tripartito en todos os sentidos: en soldos, en asesores, en débeda pero, sobre todo, en oportunidades perdidas para o concello". Nesta liña, manifesta que "o Goberno anterior chegou a costar case 20.000 euros máis que o actual, e iso sen contar as subidas de salarios públicos aplicadas desde entón polo Goberno do Estado, que nese caso achegaríase a unha diferencia de practicamente 30.000 euros ao ano".
As retribucións do equipo de Goberno dirixido por Ángel Moldes custarán algo menos de 150.000 euros, "mentres en 2021 as dedicacións exclusivas do Tripartito custaban preto de 175.000 euros, cando o alcalde estaba xubilado e o edil de Urbanismo cobrando un soldo de 40.000 euros da Deputación de Pontevedra".
"Agora, afirma Moldes, haberá un só alcalde, cun soldo razoable de alcalde, moi por debaixo do establecido por Lei para os concellos de 10.000 a 20.000 habitante, e tamén por debaixo doutros alcaldes da contorna, incluso con poboación inferior. Un soldo que, si se inclúe a actualización do IPC, sería practicamente o mesmo que o que estaban percibindo, primeiro os tres alcaldes, e que no último mandato repartiron entre varios concelleiros do Tripartito".
"Agora haberá un só soldo de alcalde, onde antes había tres para os tres partidos, haberá un só goberno, onde antes había tres, cada un cos seus orzamentos e as súas prebendas, e este Goberno xa está traballando polos veciños, como estamos demostrando en só unha semana de mandato", dixo Ángel Moldes.
Por último, recomenda ao voceiro socialista "que deixe de mentir, porque non é a mellor maneira de comezar a súa labor na oposición e demostra que non aprendeu nada do que a cidadanía lle dixo nas urnas o pasado mes de maio, cando castigaron as mentiras e a manipulación". E indica que, "o soldo do Goberno é unha das poucas cousas para os que o Tripartito deixou partida presupuestaria, ao contrario de case todo o demais".
Relacionadas:
-
Poio ten unha débeda de 8 millóns con bancos e outro millón en facturas sen pagar, segundo o alcalde Ángel Moldes
Por Manu Otero |
-
O enfrontamento político comeza en Poio dende o Pleno de organización da nova Corporación
Por Oskar Viéitez |
-
Os socialistas critican a Ángel Moldes por "converterse a si mesmo no alcalde mellor pagado da historia de Poio"
Por Oskar Viéitez |