Celebrado o Pleno organizativo para arrancar un novo mandato no Concello de Marín
Por Oskar Viéitez
O Salón de Plenos do Concello de Marín acolleu este xoves ás 20.00 horas o Pleno Organizativo que corresponde celebrar en sesión extraordinaria dentro dos 30 días que preceden á toma de posesión. O obxectivo do mesmo é resolver a constitución oficial dos grupos políticos e dos seus integrantes, así como de organizar o traballo municipal en torno ás sesións plenarias, as comisións informativas, as retribucións e a dotación de persoal eventual.
Polo seu tamaño, a normativa indica que Marín ten dereito a contar con 10 dedicacións exclusivas e 7 postos eventuais.
Sen embargo, tal e como expuxo o tenente alcalde, Manuel Santos, manteranse só as 4 dedicacións exclusivas coas que xa se viña traballando no último mandato e únicamente crearase 1 nova praza de eventual, co fin de regularizar a prestación dos servizos de comunicación que se viñan prestando e que tamén apoian as necesidades desta índole asociadas aos fondos europeos.
Destas catro dedicacións, explicou Santos, ocuparanse só tres, tal e como se ven realizando neste último mandato.
As retribucións a percibir por parte das persoas con dedicación exclusiva homológanse ás categorías funcionariais correspondentes. A retribución de Alcaldía será de 62.906,72 euros brutos anuais, unha cantidade igual á que se lle asigna ao posto de Secretaría Xeral, tal e como se leva facendo desde hai máis de 10 anos.
Para a Tenencia de Alcaldía e Concellería de Urbanismo e Facenda establécese unha retribución bruta anual de 52.821,98 euros, homologada a un funcionario do Grupo A1 cun incremento de 6.000 euros anuais.
No que respecta á Concellería de Medio Ambiente, Cultura, Benestar e Igualdade, serán asignados 49.821 euros brutos anuais, homologados a un funcionario do Grupo A1 cun incremento de 3.000 euros anuais.
Finalmente, a Concellería de Medio Rural, cuarta dedicación exclusiva do Concello, contará cunha retribución de 46.821,98 euros brutos anuais, correspondente a un persoal funcionarial do Grupo A1.
No que respecta ao persoal eventual, mantense o posto xa existente de sercretario de Alcaldía, cunha retribución asimilada á dun funcionario administrativo C1, acadando os 27.089,52 euros brutos anuais. Por outra banda, créase un posto eventual para os servizos de responsable de comunicación, equiparable a un funcionario do Grupo A1 cunha rebaixa de 6.000 euros, polo que queda unha retribución de 40.821,98 euros.
Tal e como se explicou na sesión plenaria, as retribucións propostas están dentro da horquilla que permite a Lei de Presupuestos Xerais do Estado para os concellos da categoría poboacional de Marín e levaban sen experimentar ningunha actualización desde hai máis dunha década.
PLENOS, XUNTA DE GOBERNO LOCAL E COMISIÓNS INFORMATIVAS
A sesión plenaria deste xoves serviu tamén para fixar as sesións ordinarias do Pleno da Corporación, que serán o segundo xoves de cada mes ás 20.00 horas.
Cada concelleiro (a excepción dos que xa contan con dedicación exclusiva) percibirá pola asistencia á sesión 220 euros.
Por outra banda, fixouse a convocatoria da Xunta de Goberno Local como semanal e a asistencia a este órgano (a excepción dos que teñen dedicación exclusiva) será de 130 euros por membro.
Finalmente, creáronse 7 Comisións Informativas correspondentes coas áreas de Goberno e que son: Urbanismo e Facenda; Medio Ambiente, Cultura, Benestar e Igualdade; Deportes; Medio Rural; Turismo e Comercio; Seguridade e Mobilidade; e Promoción Económica e Patrimonio.
A composición dos membros das mesmas segue un criterio de proporcionalidade, de tal xeito que estarán compostas por 1 presidente do PP, 3 concelleiros do PP, 2 do PSdG-PSOE e 1 do BNG.