O BNG de Marín quere ser canle de comunicación da veciñanza para trasladar as súas demandas ao Concello
Por Oskar Viéitez
O BNG de Marín quere intensificar o seu papel como canle de comunicación da veciñanza para trasladar as súas demandas ao Concello.
Así o anunciou a portavoz do grupo municipal do Bloque, Lucía Santos, que sinalou veñen de crear un "buzón cidadán", na súa sede da praza da Veiguiña número 7 e unha conta de correo electrónico bngmarinescoita@gmail.com onde poden trasladarse suxerencias, comentarios ou queixas.
Lucía Santos afirma que "para o BNG é unha prioridade facer un Marín máis transparente e cun goberno aberto", e por iso a súa "aposta por propiciar un proceso de transformación do concello para garantir unha administración que inspire confianza, aberta e receptiva ás demandas cidadás".
E engade que "cómpre abrir paso a un novo xeito de facer política e de administrar os intereses colectivos, apostando por un proxecto integral, participativo e solidario onde a veciñanza sexa a protagonista activa do deseño das políticas locais".