Enchen de vida as rúas Real e Cousiño cunha sorprendente decoración
Por Oskar Viéitez & Mónica Patxot
A rúa Cousiño era un deses recunchos do centro histórico de Pontevedra que pasa desapercibido para propios e estraños, a pesar de comunicar dous lugares tan visitados como o Mercado de Abastos e a praza de Méndez-Núñez.
Para cambiar a situación un grupo de empresarios da zona decoraron a rúa facéndoa moito máis atractiva, tanto que os seus veciños da rúa Real sumáronse á iniciativa.
Un dos artífices desta transformación é o hostaleiro Raúl Facciola xerente da Creperie Cre-Cotte cuxo local, precisamente, dá a estas dúas rúas.
Desde esta semana, e co permiso do Concello, a rúa Cousiño ten un teito con paraugas de cores e percorrendo a rúa Real hai unha frecha de paraugas amarelos que sinaliza o paso do Camiño Portugués a Santiago.
Fáltalles colocar as grilandas de cores que resalten a estes 140 paraugas pero os cidadáns están encantados coa decoración e a nova imaxe destas dúas rúas xa destaca polas redes sociais cos numerosos selfies que se están publicando.