Rueda fai cambios no Goberno da Xunta
Por Oskar Viéitez
O presidente da Xunta, Alfonso Rueda, fixo cambios no Goberno autonómico aproveitando as saídas cara a Madrid de dous dos seus conselleiros: o vicepresidente primeiro e conselleiro de Economía e Industria, Francisco Conde, e a conselleira de Mar, Rosa Quintana.
A remodelación afecta a Diego Calvo que ascende a vicepresidente primeiro e Ángeles Vázquez, que segue sendo conselleira de Medio Ambiente, Territorio e Vivenda, será a vicepresidenta segunda.
María Jesús Lorenzana deixa de ser conselleira de Promoción do Emprego e Igualdade e asume Economía, Industria e Innovación.
Ademais incorpóranse ao Executivo autonómico Elena Rivo, a vicerreitora do campus de Ourense da Universidade de Vigo relevará a Lorenzana en Emprego e Igualdade e a segunda fichaxe é o ourensán Alfonso Villares, o alcalde de Cervo asumirá a Consellería do Mar.
Manteñen as súas responsabilidades os conselleiros: Miguel Corgos en Facenda e Administración Pública, Ethel Vázquez en Infraestruturas e Mobilidade, Román Rodríguez en Cultura, Educación, Formación Profesional e Universidades, Julio García Comesaña en Sanidade, Fabiola García en Política Social e Xuventude e José González no medio Rural.
"Compromiso, traballo e ilusión cun só obxectivo: seguir mellorando a vida de todos os galegos. Adiante", escribiu este martes Roda nas súas redes sociais tras comunicar a súa decisión.
O decreto para configurar este novo equipo asinarase este xoves e o venres os novos conselleiros tomarán posesión das súas responsabilidades.