Vilagarcía avanza na renovación do parque móbil da Policía Local coa licitación do renting para tres novos coches
Por Redacción
O Concello de Vilagarcía continúa co proceso de renovación do parque móbil da Policía Local. Neste caso saca a licitación o arrendamento polo sistema de renting de tres vehículos novos para substituír aos outros tres que están a piques de completar o período do anterior contrato de aluguer e xa acumulan os catro anos de uso continuado.
Os vehículos terán que ter 5 portas e ser do tipo turismo ou SUV, de gasolina ou híbridos non enchufables, e estar rotulados e dotados cos equipos e sistemas que establece a normativa para os coches policiais. O contrato terá unha duración de 48 meses e licítase por importe de 183.471 euros.
Os concesionarios ou firmas interesadas dispoñen de prazo ata o día 23 de xuño para presentar as súas propostas conforme aos pregos de condicións que se poden consultar na plataforma pública de contratación. Neles fíxase que o contrato incluirá os servizos de mantemento e reparacións na propia concesionaria da marca. Ademais, os vehículos deberán estar matriculados e asegurados a todo risco e cunha ampla cobertura.
A sinalización, pintura e rotulación dos coches patrulla cumprirán o establecido por lei, ao igual que os equipos luminosos e acústicos propios dos coches policiais. Ademais, cada automóbil debe incluír no seu equipamento botiquín, cristais escurecidos, dúas lanternas policiais, extintor, prancha e barra de separación entre os asentos dianteiros e posteriores con soporte de defensas policiais e emisora compatible co sistema de comunicación da Policía, navegador, cámara traseira e atención telefónica de mans libres, entre outros elementos.
A adxudicataria terá que entregar os vehículos completamente acondicionados e dotados, así como con toda a documentación en regra para poder entran en circulación. Disporá para elo dun prazo de dous meses a contar dende a firma do contrato.
O Concello de Vilagarcía recorre xa dende hai anos ao renting para o subministro dos coches da Policía Local, xa que este sistema permite dispor de vehículos completamente novos por un período relativamente curto (catro anos neste caso) e ilos renovando con frecuencia, algo que se precisa debido ao uso intensivo que se lles dá. Deste xeito garántese o mantemento dun parque móbil en perfecto estado, moderno e actualizado coas últimas tecnoloxías, o que incide nunha mellor prestación do servizo policial e tamén no cumprimento das normativas de baixas reducións de CO2 e de sustentabilidade medioambiental e eficiencia enerxética.